Category Archives: Pistlar

Uppgjör 2013 – Hluti 2: Vonbrigðin/verstu kaupin

Uppgjör leiktíðarinnar 2012-2013 heldur áfram hjá okkur á Sjöunni og þá er komið að þeim leikmönnum sem þótt hafa valdið vonbrigðum.  Nokkrir hafa spilað í Ensku Úrvalsdeildinni áður en allir eiga þeir sameiginlegt að hafa leikið fyrir nýtt lið á þessu tímabili og er því tilvalið að skoða félagsskipti þeirra og hvernig þeim hefur vegnað hjá sínum nýju félögum. Tilnefndir eru:

Esteban Granero

"Sjóræninginn" hefði mátt spila jafn vel og hann lúkkar

Þessi spænski leikstjórnandi hafði leikið 67 leiki fyrir aðallið Real Madrid þegar hann kom til QPR síðasta sumar.  Hann var keyptur til að stýra spili liðsins, en hefur eins og reyndar flestir liðsfélagar sínir verið arfaslakur á leiktíðinni og einungis gert eitt mark og lagt upp jafnmörg í 23 leikjum.  Mun væntanlega fara frá liðinu í sumar en m.v. frammistöðuna í vetur er ekki víst að margir hafi áhuga.

Olivier Giroud

"Get ég fengið fleiri mörk?"

Þegar Arsene Wenger og stjórn Arsenal varð ljóst að Robin van Persie myndi ekki framlengja samning sinn við liðið síðasta sumar ákvað stjórinn að róa á kunnugleg mið og keypti manninn sem hafði verið markahæstur í Frönsku Úrvalsdeildinni á síðastliðinni leiktíð.  Olivier Giroud kom frá Frakklandsmeisturum Montpellier fyrir rúmar 9 milljónir punda og hafði stórt skarð að fylla.  Hann olli hins vegar miklum vonbrigðum og var álíka gagnlegur og steinþurs utan á Notre Dame kirkjunni í framlínu Arsenal.  Einhverjir myndu benda á að 11 mörk í 33 deildarleikjum væri ekki slæm tölfræði en staðreyndin er sú að einungis 3 af þessum mörkum hafa skilað Arsenal einhverjum konkret stigum.  Hin mörkin hafa komið í leikjum sem Arsenal vinnur með 2 mörkum eða meira.  Hann þarf að gera minna af því að klikka á dauðafærum og skora fleiri mörk sem telja.

Christopher Samba

"Hvað er ég búinn að koma mér út í?"

Varnartröllið frá Kongó var orðinn ansi eftirsóttur þegar hann lék með Blackburn fyrir ekki svo löngu síðan.  Hann kom til QPR í janúar frá rússneska liðinu Anzhi Makhachkala fyrir 12 milljónir punda og gerði 4 ára samning uppá 100.000 pund á mánuði.  Því miður hefur liðið einungis haldið hreinu í einum af þeim tíu leikjum sem Samba hefur spilað og hann var svo slakur gegn Fulham þann 1. Apríl að margir héldu að hann væri að gera grín.  Verður væntanlega einna fyrstur til að fara í fyrirhugaðri brunaútsölu liðsins í sumar.

Pavel Pogrebnyak

Pavel var að spila undir pari í vetur

Rússinn Pavel Pogrebnyak gerði góða hluti hjá Fulham á seinni hluta síðustu leiktíðar og skoraði t.a.m. 6 mörk í 12 leikjum.  Hann kom frítt til Reading fyrir tímabilið en talið er að félagið hafi borgað honum góða summu fyrir að skrifa undir samning.  Hann hefur hins vegar valdið vonbrigðum og skorað aðeins 5 mörk í vetur.

Emmanuel Adebayor

Það hefur hvorki gengið né rekið hjá Adebayor í vetur

Framherjinn stóri og stæðilegi frá Tógó skoraði 17 mörk og lagði upp 12 í búningi Tottenham í fyrra meðan hann var í láni frá Manchester City (sem á meðan borguðu meirihluta launa hans).  Skiljanlega ákváðu Spursarar því að festa kaup á Adebayor fyrir 5 milljónir punda fyrir leiktíðina til að auka breiddina í sóknarlínunni hjá sér.  „Latibayor“ hefur hins vegar varla sést á leiktíðinni og kórónaði slaka frammistöðu á árinu með kjánalegu aðhlaupi og ömurlegri vítaspyrnu þegar liðið féll úr leik gegn Basel í 8-liða úrslitum Evrópudeildarinnar.  Hefur gert 3 deildarmörk á leiktíðinni sem er jafnmikið og t.d. Per Mertesacker, Sebastien Bassong og Emmerson Boyce.

Joe Allen

Stuðningsmenn Liverpool eru margir hverjir ósáttir við Allen

Walesverjinn Joe Allen kom til Liverpool frá uppeldisfélagi sínu, Swansea síðasta sumar fyrir 15 milljónir punda.  Hann hafði spilað vel undir stjórn Brendan Rodgers hjá Swansea og þegar stjórinn færði sig um set ákvað hann að taka Allen með sér.  Margir settu þó spurningarmerki við verðmiðann, sem þótti heldur hár.  Það er ekki hægt að segja að Allen hafi smellpassað inn í lið Liverpool, mörgum þykir hann hægja á spili liðsins og oft hefur hann einfaldlega virkað úr takti við það sem er í gangi inni á vellinum.  Hans framlag er auðvitað ekki mælt í mörkum og stoðsendingum (hann hefur reyndar skilað hvorugu) en á heildina litið hefur liðið spilað betur þegar hann er ekki með.

Sigurvegari: Emmanuel Adebayor

Tógómaðurinn tekur skammarverðlaunin þetta árið en hann hefur verið arfaslakur með Tottenham í ár.  Þar sem launakröfur hans voru of háar fyrir Tottenham ákvað Manchester City að borga honum áfram laun til að mæta afgangi og fá félagsskiptin í gegn.  Þegar þetta er skrifað hefur Adebayor gert 3 mörk í 21 leik í deildinni og það er alveg ljóst að maður sem er að fá borguð himinhá laun frá tveimur liðum á sama tíma á að gera betur.

Birt undir Arsenal, Félagsskipti, Liverpool, Pistlar, QPR, Reading, Tottenham, Umfjöllun | Tagged , , | 1 Ummæli

Skítavítanýting

Ég trúi á heilagan Ferguson og ætti ekki frekar en aðrir nokkurn tímann að efast um einhverja af hans ákvörðunum eða athöfnum. Mér er engu að síður fyrirmunað að skilja hvers vegna sú regla er ekki höfð í heiðri hjá Manchester United að sé Robin van Persie inni á vellinum hafi hann það hlutskipti að taka vítaspyrnur liðsins. Maðurinn er með einn traustasta vinstri fót í heimi og skilaði 85% vítanýtingu á tíma sínum með Arsenal. Ég nennti að pæla aðeins í þessu út af skelfilegri vítanýtingu United á leiktíðinni en Van Persie skoraði úr eina af fjórum vítum sem United hefur nýtt í deildinni til þessa. Lesa meira

Birt undir Pistlar, Premier | Skildu eftir ummæli

Belgíska Byltingin

Á síðustu árum hefur fjöldi belgískra gæðaleikmanna streymt inn í Ensku Úrvalsdeildina og er það vel.  Raunar er það svo að af 25 leikmönnum í síðasta landsliðshópi Belga leika 12 í Englandi (ef með eru taldir Chelsea-mennirnir Kevin De Bruyne sem er í láni hjá Werder Bremen og Thibaut Courtois sem dvelur hjá Atletico Madrid).  Auk þeirra eru þetta þeir Simon Mignolet, Vincent Kompany, Thomas Vermaelen, Jan Vertonghen, Moussa Dembele, Marouane Fellaini, Kevin Mirallas, Eden Hazard, Romelu Lukaku og Christian Benteke.  Það er því ljóst að þessir leikmenn gætu myndað ágætis byrjunarlið a.m.k á pappír. Lesa meira

Birt undir Pistlar, Premier, Umfjöllun | Tagged , | 6 Ummæli

Fantasy-deildin – 1.umferð

Nú byrjar Enski boltinn að rúlla um helgina og því fylgir að Fantasy Football fer í gang sem margir sparkspekingar og tölfræðinördar hafa gaman af. Hér á Sjöunni ætlum við að reyna að halda úti smá Fantasy horni þar sem rýnt verður í leiki hverrar umferðar, skoðað hvaða leikmenn eru líklegir til afreka, hvar hægt er að gera kjarakaup og hver gæti staðið sig sem fyrirliði.

Í lok hverrar umferðar verður farið yfir gang mála þar sem skoðað verður hvaða leikmenn voru að standa sig og hvaða leikmenn voru að skíta, hetja og skúrkur umferðarinnar valinn og jafnvel rennt yfir stöðu mála í opinberu Fantasy-deild Sjöunnar. Í þessum fyrsta pistli verður skoðað helstu nýju leikmennina í deildinn og rennt yfir hvaða menn hafa verið í formi á pre-seasoninu. Lesa meira

Birt undir Fantasy, Pistlar, Premier, Umfjöllun | Skildu eftir ummæli

Robin er hvort sem er lélegasta ofurhetjan.

Fréttirnar gerast ekki mikið stærri en í gær þegar fregnir bárust af því að Robin van Persie, fyrirliði Arsenal, væri á leiðinni til Manchester United. Á meðan United menn kepptust við að ímynda sér kappann haldandi á Meistaradeildarbikarnum næstkomandi vor heyrðist í Arsenal-mönnum að hann væri bara meiðslapési sem nánast ekkert gagn væri af. Aðdáendur annara liða klóruðu sér í kollstykkinu yfir þeirri ákvörðun Arsenal-manna að selja sinn besta mann, fjandinn hafi það, besta mann deildarinnar til þess liðs sem hefur drottnað yfir deildinni síðustu tvo áratugi. Arséne, hvað varstu eiginlega að spá?

Lesa meira

Birt undir Arsenal, Pistlar, Premier, Umfjöllun | Tagged | 5 Ummæli