Category Archives: Umfjöllun

Uppgjör 2013 – Hluti 2: Vonbrigðin/verstu kaupin

Uppgjör leiktíðarinnar 2012-2013 heldur áfram hjá okkur á Sjöunni og þá er komið að þeim leikmönnum sem þótt hafa valdið vonbrigðum.  Nokkrir hafa spilað í Ensku Úrvalsdeildinni áður en allir eiga þeir sameiginlegt að hafa leikið fyrir nýtt lið á þessu tímabili og er því tilvalið að skoða félagsskipti þeirra og hvernig þeim hefur vegnað hjá sínum nýju félögum. Tilnefndir eru:

Esteban Granero

"Sjóræninginn" hefði mátt spila jafn vel og hann lúkkar

Þessi spænski leikstjórnandi hafði leikið 67 leiki fyrir aðallið Real Madrid þegar hann kom til QPR síðasta sumar.  Hann var keyptur til að stýra spili liðsins, en hefur eins og reyndar flestir liðsfélagar sínir verið arfaslakur á leiktíðinni og einungis gert eitt mark og lagt upp jafnmörg í 23 leikjum.  Mun væntanlega fara frá liðinu í sumar en m.v. frammistöðuna í vetur er ekki víst að margir hafi áhuga.

Olivier Giroud

"Get ég fengið fleiri mörk?"

Þegar Arsene Wenger og stjórn Arsenal varð ljóst að Robin van Persie myndi ekki framlengja samning sinn við liðið síðasta sumar ákvað stjórinn að róa á kunnugleg mið og keypti manninn sem hafði verið markahæstur í Frönsku Úrvalsdeildinni á síðastliðinni leiktíð.  Olivier Giroud kom frá Frakklandsmeisturum Montpellier fyrir rúmar 9 milljónir punda og hafði stórt skarð að fylla.  Hann olli hins vegar miklum vonbrigðum og var álíka gagnlegur og steinþurs utan á Notre Dame kirkjunni í framlínu Arsenal.  Einhverjir myndu benda á að 11 mörk í 33 deildarleikjum væri ekki slæm tölfræði en staðreyndin er sú að einungis 3 af þessum mörkum hafa skilað Arsenal einhverjum konkret stigum.  Hin mörkin hafa komið í leikjum sem Arsenal vinnur með 2 mörkum eða meira.  Hann þarf að gera minna af því að klikka á dauðafærum og skora fleiri mörk sem telja.

Christopher Samba

"Hvað er ég búinn að koma mér út í?"

Varnartröllið frá Kongó var orðinn ansi eftirsóttur þegar hann lék með Blackburn fyrir ekki svo löngu síðan.  Hann kom til QPR í janúar frá rússneska liðinu Anzhi Makhachkala fyrir 12 milljónir punda og gerði 4 ára samning uppá 100.000 pund á mánuði.  Því miður hefur liðið einungis haldið hreinu í einum af þeim tíu leikjum sem Samba hefur spilað og hann var svo slakur gegn Fulham þann 1. Apríl að margir héldu að hann væri að gera grín.  Verður væntanlega einna fyrstur til að fara í fyrirhugaðri brunaútsölu liðsins í sumar.

Pavel Pogrebnyak

Pavel var að spila undir pari í vetur

Rússinn Pavel Pogrebnyak gerði góða hluti hjá Fulham á seinni hluta síðustu leiktíðar og skoraði t.a.m. 6 mörk í 12 leikjum.  Hann kom frítt til Reading fyrir tímabilið en talið er að félagið hafi borgað honum góða summu fyrir að skrifa undir samning.  Hann hefur hins vegar valdið vonbrigðum og skorað aðeins 5 mörk í vetur.

Emmanuel Adebayor

Það hefur hvorki gengið né rekið hjá Adebayor í vetur

Framherjinn stóri og stæðilegi frá Tógó skoraði 17 mörk og lagði upp 12 í búningi Tottenham í fyrra meðan hann var í láni frá Manchester City (sem á meðan borguðu meirihluta launa hans).  Skiljanlega ákváðu Spursarar því að festa kaup á Adebayor fyrir 5 milljónir punda fyrir leiktíðina til að auka breiddina í sóknarlínunni hjá sér.  „Latibayor“ hefur hins vegar varla sést á leiktíðinni og kórónaði slaka frammistöðu á árinu með kjánalegu aðhlaupi og ömurlegri vítaspyrnu þegar liðið féll úr leik gegn Basel í 8-liða úrslitum Evrópudeildarinnar.  Hefur gert 3 deildarmörk á leiktíðinni sem er jafnmikið og t.d. Per Mertesacker, Sebastien Bassong og Emmerson Boyce.

Joe Allen

Stuðningsmenn Liverpool eru margir hverjir ósáttir við Allen

Walesverjinn Joe Allen kom til Liverpool frá uppeldisfélagi sínu, Swansea síðasta sumar fyrir 15 milljónir punda.  Hann hafði spilað vel undir stjórn Brendan Rodgers hjá Swansea og þegar stjórinn færði sig um set ákvað hann að taka Allen með sér.  Margir settu þó spurningarmerki við verðmiðann, sem þótti heldur hár.  Það er ekki hægt að segja að Allen hafi smellpassað inn í lið Liverpool, mörgum þykir hann hægja á spili liðsins og oft hefur hann einfaldlega virkað úr takti við það sem er í gangi inni á vellinum.  Hans framlag er auðvitað ekki mælt í mörkum og stoðsendingum (hann hefur reyndar skilað hvorugu) en á heildina litið hefur liðið spilað betur þegar hann er ekki með.

Sigurvegari: Emmanuel Adebayor

Tógómaðurinn tekur skammarverðlaunin þetta árið en hann hefur verið arfaslakur með Tottenham í ár.  Þar sem launakröfur hans voru of háar fyrir Tottenham ákvað Manchester City að borga honum áfram laun til að mæta afgangi og fá félagsskiptin í gegn.  Þegar þetta er skrifað hefur Adebayor gert 3 mörk í 21 leik í deildinni og það er alveg ljóst að maður sem er að fá borguð himinhá laun frá tveimur liðum á sama tíma á að gera betur.

Birt undir Arsenal, Félagsskipti, Liverpool, Pistlar, QPR, Reading, Tottenham, Umfjöllun | Tagged , , | 1 Ummæli

Uppgjör 2013 – Hluti 1: Ósýnilegi maður ársins

Leiktíðin 2012-2013 er senn á enda í enska boltanum.  Nú er það svo að toppbaráttan er löngu ráðin og aðeins á eftir að afhenda rauða liðinu í Manchester titilinn.  Á botninum er baráttan álíka óspennandi og aðeins spurning um hvaða lið fylgir QPR og Reading niður í Championship-deildina.  Mesta spennan er því eiginlega um 3. og 4. sætið þar sem Lundúnarisarnir Arsenal, Chelsea og Tottenham berjast um tvö laus sæti í Meistaradeild Evrópu að ári.

Þessi ætti að komast óséður í gegnum varnir andstæðinganna

Við hér á Sjöunni ætlum í þessari viku að taka smá forskot á sæluna og taka saman lista yfir hitt og þetta sem viðkemur Úrvalsdeildinni og við byrjum á óhefðbundnum skammarverðlaunum.  Í flokknum „Ósýnilegi maður ársins“ eru tilfnefndir þeir leikmenn sem fyrirfram var búist við að myndu láta meira til sín taka á árinu en raun hefur orðið.  Tilnefndir eru:

Nani

Það hefur hvorki gengið né rekið hjá Nani í vetur

Fyrir leiktíðina var nokkuð rætt um að Nani myndi um lið og fara til Rússlands að eltast við hærri laun.  Það gerðist ekki en það sem gerðist hins vegar var að Nani var settur í frystiklefann og hefur lítið fengið að spila.  Maðurinn sem lagði upp flest mörk leiktíðina 2010-2011 hefur aðeins tekið þátt í 10 leikjum og þar af aðeins þrisvar leikið allar 90 mínúturnar.  Gott ef hann verður ekki bara seldur í sumar.

Darren Bent

Bent skilur hvorki upp né niður í hlutunum

Maðurinn sem áður hafði raðað inn mörkunum fyrir Sunderland gekk til liðs við Aston Villa í janúar 2011 og áður en kom að þessu tímabili hafði honum gengið ágætlega á Villa Park.  Á þessu tímabili lenti hann hins vegar í ósætti við Paul Lambert þjálfara og síðan 27. Október í fyrra hefur Bent aðeins spilað 104 mínútur í deildinni.  Hvort sem Villa fellur eða ekki hlýtur Bent að verða seldur í sumar, nema að þeir skipti um stjóra (sem er reyndar alveg líklegt).

Maicon

Það var erfitt að finna mynd af Maicon í City búningnum

Man einhver þegar sífellt var verið að orða hægri bakvörðinn Maicon við Real Madrid fyrir fáránlegar upphæðir?  Sl. sumar gekk hann til liðs við Manchester City og hefur á þessu tímabili aðeins leikið fjóra heila leiki og þrisvar sinnum komið inná sem varamaður.  Vissulega hefur hann verið eitthvað meiddur en þetta er samt sem áður skelfileg tölfræði hjá Brasilíumanninum.  Það sem réttlætir hana aðeins er frábær frammistaða Zabaleta í hægri bakverðinum hjá City.

Jack Rodwell

Rodwell hefur ekki beinlínis slegið í gegn hjá City

Annar leikmaður Manchester City á þessum lista er miðjumaðurinn sem þeir keyptu frá Everton í byrjun leiktíðar.  Hann hefur síðan þá aðeins tekið þátt í 8 deildarleikjum og yfirleitt verið arfaslakur þegar hann fær að spila.

Grant Holt

Holtarinn er búinn að vera í ruglinu á leiktíðinni

Framherjinn sem raðaði inn mörkunum fyrir Norwich City í fyrra er eini maðurinn á listanum sem hefur fengið mikið að spila.  En þrátt fyrir að spila velflesta leiki hefur hann lítið sést í sóknarleik Norwich og yfirleitt virkað of þungur og áhugalaus.  Skiljanlega hefur liðið bætt við sig sóknarmönnunum Kei Kamara og Luciano Becchio til að reyna að auka breiddina, enda hafa 5 mörk frá Holt ekki fleytt þeim langt, m.v. hans 15 á síðasta tímabili.

Sigurvegari: Darren Bent

Maður hefur ekkert séð af Darren Bent þessa leiktíðina.  Hvort sem það orsakast af meiðslum, slæmu leikformi eða ósætti við þjálfarann, þá vill maður sjá meira frá manni sem hefur verið keyptur milli félaga fyrir samtals 60 milljónir punda.  Það er engin spurning að Villa hefði vel getað notað þennan mann í vetur, jafnvel þó að Benteke hafi staðið sig vel.

 

Birt undir Aston Villa, Man City, Man Utd, Norwich, Premier, Umfjöllun, Uncategorized | Tagged , | Skildu eftir ummæli

Belgíska Byltingin

Á síðustu árum hefur fjöldi belgískra gæðaleikmanna streymt inn í Ensku Úrvalsdeildina og er það vel.  Raunar er það svo að af 25 leikmönnum í síðasta landsliðshópi Belga leika 12 í Englandi (ef með eru taldir Chelsea-mennirnir Kevin De Bruyne sem er í láni hjá Werder Bremen og Thibaut Courtois sem dvelur hjá Atletico Madrid).  Auk þeirra eru þetta þeir Simon Mignolet, Vincent Kompany, Thomas Vermaelen, Jan Vertonghen, Moussa Dembele, Marouane Fellaini, Kevin Mirallas, Eden Hazard, Romelu Lukaku og Christian Benteke.  Það er því ljóst að þessir leikmenn gætu myndað ágætis byrjunarlið a.m.k á pappír. Lesa meira

Birt undir Pistlar, Premier, Umfjöllun | Tagged , | 6 Ummæli

„Ég vil fá titilinn minn aftur“

Nú er fyrstu umferð tímabilsins nánast lokið og óhætt að segja hún hafi heldur betur staðið undir væntingum. Í kvöld mun tímabilið klárast þegar leikmenn Manchester United hefja titilbaráttuna á Goodison Park gegn Everton. Stóra spurningin fyrir þennan leik er hvort að Robin van Persie muni spila sinn fyrsta leik fyrir United. Þeirri spurningu verður auðsvarað í kvöld en við gætum einnig fengið vísbendingu um svar við annari spurningu sem hefur vaknað í kolli knattspyrnuáhugamanna eftir þessi kaup. Hvernig mun Robin van Persie passa inn í lið United og hvernig mun liðið spila með van Persie innanborðs? Lesa meira

Birt undir Man Utd, Umfjöllun | 14 Ummæli

Fantasy-deildin – 1.umferð

Nú byrjar Enski boltinn að rúlla um helgina og því fylgir að Fantasy Football fer í gang sem margir sparkspekingar og tölfræðinördar hafa gaman af. Hér á Sjöunni ætlum við að reyna að halda úti smá Fantasy horni þar sem rýnt verður í leiki hverrar umferðar, skoðað hvaða leikmenn eru líklegir til afreka, hvar hægt er að gera kjarakaup og hver gæti staðið sig sem fyrirliði.

Í lok hverrar umferðar verður farið yfir gang mála þar sem skoðað verður hvaða leikmenn voru að standa sig og hvaða leikmenn voru að skíta, hetja og skúrkur umferðarinnar valinn og jafnvel rennt yfir stöðu mála í opinberu Fantasy-deild Sjöunnar. Í þessum fyrsta pistli verður skoðað helstu nýju leikmennina í deildinn og rennt yfir hvaða menn hafa verið í formi á pre-seasoninu. Lesa meira

Birt undir Fantasy, Pistlar, Premier, Umfjöllun | Skildu eftir ummæli